គៀវ៖ ប្រធានាធិបតីអ៊ុយក្រែន លោក ហ្សឺលែនស្គី បានផ្ញើសារអរគុណនាយករដ្ឋមន្ត្រីកម្ពុជា សម្ដេចតេជោ ហ៊ុន សែន ដែលប្រកាន់ជំហរគាំទ្រការគោរពអធិបតេយ្យភាព និងបូរណភាពទឹកដីរបស់ប្រទេសអ៊ុយក្រែន។ នេះបើតាមការបង្ហោះរបស់លោកសេឡែនស្គីនៅលើ twitter ផ្លូវការរបស់លោកនាយប់ថ្ងៃទី០១ ខែវិច្ឆិកានេះ។
ការបង្ហោះរបស់លោកហ្សឺលែនស្គី គឺបន្ទាប់ពីលោកបានជួបពិភាក្សាតាមទូរសព្ទជាមួយនឹងសម្ដេចតេជោ ហ៊ុន សែន កាលពីរសៀលម៉ោង ៤រសៀល ថ្ងៃទី១ ខែវិច្ឆិកា ដើម្បីពិភាក្សាអំពីបញ្ហាទំនាក់ទំនងទ្វេភាគីរវាងកម្ពុជា-អ៊ុយក្រែន ក៏ដូចជាអាស៊ាន-អ៊ុយក្រែន។
កម្ពុជាគឺជាប្រទេសមួយដែលជំទាស់ជានិច្ចលើការឈ្លានពានរបស់រុស្ស៉ីនេះដោយបង្ហាញឡើងតាមរយៈការបោះឆ្នោតប្រឆាំងការលុកលុយ និងទាមទារឱ្យរុស្ស៊ីដកទ័ពចេញពីទឹកដីអ៊ុយក្រែន ទោះជាយ៉ាងប្រទេសកម្ពុជាក៏មិនគាំទ្រការដាក់ទណ្ឌកម្មលើរុស្ស៉ីផងដែរដោយចាត់ទុកថាសកម្មភាពទណ្ឌកម្មលើរុស្ស៊ីនឹងបង្ករការខាតបង់កាន់តែខ្លាំង៕
